Author: vanko
•9:32 PM
image source: http://www.englishexercises.org

မည်းမှောင်နေတဲ့ ထင်းရူးတောတန်းနှစ်ခုက ချောင်းရဲ့ တစ်ဖက်တစ်ချက်ကနေ မျက်မှောင်ကုတ်ကြည့်နေသလို ထင်ရသည်။ လေတိုက်ထားလို့ ပင်စည်တွေပေါ်မှာ ကပ်နေတဲ့ နှင်းဖတ်တွေမှာ အစင်းအစင်းတွေဖြစ်နေတယ်။ ထင်းရူးပင်တွေက တစ်ပင်ကိုတစ်ပင် မှီထားသလိုလို။ အလင်းရောင်ဖျော့ဖျော့အောက်မှာ မှောင်မည်းပြီး မကောင်းဆိုးဝါး အရိပ်တွေလိုမျိုး။ နက်ရှိုင်းတဲ့ တိတ်ဆိတ်မှုက ပတ်ဝန်းကျင်တခုလုံးကို စိုးမိုးထားသည်။ အသက်ဝိညာဉ်မဲ့ ရှင်သန်လှုပ်ရှားမှုမဲ့နေသည့် ပတ်ဝန်းကျင်တခုလုံးသည် စိတ်ချောက်ခြားအားငယ်စရာ။ တောအုပ်ရဲ့ ကြေကွဲဝမ်းနည်းနေတဲ့ ဝိညာဉ်ထက်ကိုပိုပြီး အေးခဲအထီးကျန်နေသည်။ ဒီတောအုပ်ရဲ့ ဝိညာဉ်ထဲမှာ ရယ်သံရဲ့ အရိပ်အယောင်ရှိနေသည်။ ဝမ်းနည်းကြေကွဲမှုတိုင်းထက် ပိုပြီး ကြောက်စရာကောင်းတဲ့ ရယ်သံ- စဖင့်ရုပ်ထုရဲ့ အပြုံးလို ဟာသဓါတ်ခံကင်းမဲ့တဲ့ ရယ်သံ- ဒီတောအုပ်လိုပဲ အေးစက်ပြီးတော့ မြဲမြံခိုင်ကျည်ခြင်းကို အားဖြည့်ထားတဲ့ ရယ်သံ။ ဘဝရဲ့ အချည်းနှီးဖြစ်ရမှုနဲ့ ရုန်းကန်ရမှုတွေကို လှောင်ပြောင်နေတဲ့ တန်ခိုးသြဇာကြီးမားပြီး ဆုပ်ကိုင်မရတဲ့ ဥာဏ်ပညာရဲ့ ထာဝရရယ်သံ။ ဒါဟာ သဘာဝအရိုင်း၊ တောအရိုင်း- ရက်စက်ကြမ်းကြုတ်ပြီး အေးခဲနေတဲ့နှလုံးသားနဲ့ မြောက်ပိုင်းနယ်မြေတောအရိုင်း။

ဒါပေမယ့် အဲဒီမှာ ရှင်သန်ခြင်းရှိနေတယ်။ သဘာဝရိုင်းကို အာခံဖီဆန်နေတဲ့ တခြားအရပ်ကလာတဲ့ ရှင်သန်ခြင်း။ ရေခဲနေတဲ့ ချောင်းရိုးအတိုင်း ဝံပုလွေနဲ့တူတဲ့ ခွေးတွေ အတန်းလိုက် တအိအိဆင်းလာနေသည်။ သူတို့ရဲ့ အမွေးကြမ်းတွေမှာ နှင်းတွေနဲ့ သီးခဲနေတယ်။ သူတို့ ပါးစပ်ထဲက အသက်ရှုပြီး မှုတ်ထုတ်လိုက်တဲ့လေဟာ လေထဲမှာပဲ အေးခဲသွားပြီး ရေခဲမှုန်လေးတွေက သူတို့အမွေးကြမ်းတွေအဖျားမှာ သွားပြီး သီးခဲနေတယ်။ ခွေးတွေမှာ သားရေသိုင်းကြိုးတွေချည်ထားပြီး စွတ်ဖားလှည်းတစီးကို ဆွဲလာကြသည်။ စွတ်ဖားလှည်းမှာ အောက်ခံခြေထောက်တွေမပါပဲ သစ်မာသားနဲ့လုပ်ထားတဲ့ ကိုယ်ထည်တခုလုံးက နှင်းပြင်ပေါ်မှာ အပြားလိုက်ရှိနေသည်။ စွတ်ဖားပေါ်မှာကတော့ ခပ်ရှည်ရှည်မျောမျော လေးထောင့်သေတ္တာတလုံးကို ကြိုးနဲ့သေသေချာချာတုပ်ချည်ထားသည်။ တခြားပစ္စည်းပစ္စယတွေလည်း စွတ်ဖားလှည်းပေါ်မှာ ပါတယ်။ စောင်တွေရယ်၊ ပုဆိန်တစ်လက်ရယ်၊ ကော်ဖီအိုးတစ်လုံး၊ အကြော်ဒယ်အိုးတစ်ခု။ ဒါပေမယ့် ထင်ရှားမြင်သာပြီး စွတ်ဖားလှည်းတစ်ခုလုံးရဲ့ နေရာအများစုကိုယူထားတာကတော့ အဲဒီ လေးထောင့်သေတ္တာရှည်ပဲဖြစ်သည်။



ခွေးတွေရဲ့ အရှေ့မှာက လူတစ်ယောက်။ နှင်းတောစီးဖိနပ် အပြားအကြီးကြီးနဲ့။ နှင်းတောထဲမှာ ခက်ခက်ခဲခဲ လျှောက်လာနေသည်။ စွတ်ဖားလှည်းရဲ့ အနောက်မှာလည်း လူတစ်ယောက်။ စွတ်ဖားပေါ်က သေတ္တာရှည်ထဲမှာကတော့ တတိယလူတစ်ယောက်- လဲလျှောင်းပြီးပါလာတယ်။ နောက်ထပ်ဘယ်တော့မှ မလှုပ်ရှား မရုန်းကန်နိုင်တော့အောင် သဘာဝရိုင်းက အနိုင်ယူသွားခြင်းကို ခံလိုက်ရတဲ့ လူတစ်ယောက်။ သဘာဝရိုင်းက လှုပ်ရှားမှုတွေကို မနှစ်သက်ဘူး။ ရှင်သန်ခြင်းဆိုတာ သူ့ကို ဆန့်ကျင်မှုပဲ။ ရှင်သန်နေခြင်းဆိုတာ လှုပ်ရှားနေခြင်းဖြစ်တယ်။ ဒီသဘာဝရိုင်းက လှုပ်ရှားမှုတိုင်းကို ဖျက်ဆီးပစ်ဖို့ အမြဲအားထုတ်နေတယ်။ ရေတွေကို ပင်လယ်ထဲ စီးဆင်းမသွားနိုင်အောင် အေးခဲပစ်သည်။ သစ်ပင်တွေက သစ်စေးရည်တွေ စီးထွက်လာပြီး အေးခဲသွားအောင် သေဆုံးသွားအောင် လုပ်ပစ်သည်။ အရက်စက်ဆုံးနဲ့ ကြောက်စရာအကောင်းဆုံးကတော့ လူသားကို ဒူးထောက်အရှုံးပေးလာအောင် အဆက်မပြတ် လိုက်လံခြေမှုန်းနေခြင်းပဲဖြစ်သည်။ လူဆိုတာကလည်း ဆောက်တည်ရာမရ မနားမနေ အလှုပ်ရှားရဆုံး ဘဝတစ်ခု- ရှင်သန်လှုပ်ရှားမှုတိုင်းဟာ ရပ်နားခြင်းနဲ့အဆုံးသတ်ရမယ်ဆိုတဲ့ အဆိုကို တော်လှန်ဖို့ အမြဲကြိုးစားနေတဲ့ ဘဝတစ်ခုပေပဲကိုး။

စွတ်ဖားလှည်းအရှေ့နဲ့ အနောက်မှာတော့ အသက်ရှင်သန်နေဆဲ လူနှစ်ယောက်ဟာ အရှုံးမပေးစတမ်း ခရီးကြမ်းနှင်နေဆဲ။ ကိုယ်ပေါ်မှာ သိုးမွေးနဲ့ သားရည်ထည်တွေကို ဝတ်ထားတယ်။ သူတို့ အသက်ရှုထုတ်လိုက်တဲ့ လေတွေက ခဲပြီး မျက်တောင်တွေ ပါးတွေ နှုတ်ခမ်းတွေမှာ ရေခဲမှုန်တွေကပ်နေလို့ မျက်နှာပုံတောင် ဖမ်းမရတော့ဘူး။ ပြဇာတ်ထဲက သူရဲတွေ ပုံစံမျိုးဖြစ်နေတယ်။ ပရလောကထဲက တစ္ဆေသူရဲတစ်ကောင်ရဲ့ အသုဘကို လိုက်ပို့ဆောင်ပေးနေတဲ့ သူရဲနှစ်ကောင်နဲ့တူတယ်။ တကယ်ကတော့ သူတို့ဟာ အေးခဲပြီး လူသူကင်းမဲ့ခြောက်ခြားစရာ နယ်မြေကို ထိုးဖောက်သွားနေတဲ့ လူသားနှစ်ယောက်သာ။ ဝေးလံသီခေါင်ပြီး အကျွမ်းတဝင်မရှိလှတဲ့ နယ်မြေ၊ အာကာသချောက်နက်ကြီးလို နက်ရှိုင်းအေးခဲနေတဲ့ နယ်မြေကျယ်ကြီးကို အံတုဖို့ ကြီးကျယ်လှတဲ့ စွန့်စားခန်းကြီးကို စွန့်စားဖို့ စိတ်ပိုင်းဖြတ်ထားတဲ့ သေးငယ်လှတဲ့ လူစွန့်စားနှစ်ဦးမျှသာ။

သူတို့ဟာ ခွန်အားနဲ့ အသက်ရှုနှုန်းကို ခြွေတာပြီး စကားတစ်ခွန်းမှ မပြောပဲ ခရီးနှင်နေကြတယ်။ တိတ်ဆိတ်မှုက ဘက်ပေါင်းစုံကနေ သိသိသာသာကြီး ဖိစီးထားသည်။ ရေငုတ်သမားတွေ ရေနက်ထဲမှာ ရေဖိအားဒဏ်ကို ခံနေရသလို သူတို့စိတ်ထဲမှာလည်း တိတ်ဆိတ်မှုရဲ့ ဖိအားကို ခံနေရသည်။ မဆုံးနိုင်အောင် ကြီးမားကျယ်ပြန့် လေးလံတဲ့ တိတ်ဆိတ်မှုက သူတို့ကို ဖိညှစ်နင်းခြေနေသည်။ လူရဲ့ တလွဲမာန်မာနတွေ ကိုယ့်ဘာသာကိုယ် ချီးမြှောက်ပြီး ဘဝင်ခိုက်နေတာတွေ ကိုယ့်တန်ဖိုးကို ပိုပိုသာသာ သက်မှတ်ထားတဲ့အဖြစ်တွေကနေ  လူဆိုတာ မမြင်နိုင်တဲ့ ကြီးကျယ်တဲ့ ဓါတ်သဘာဝတွေနဲ့ စွမ်းအင်တွေရဲ့ အပြန်အလှန် သက်ရောက်မှု တုံ့ပြန်မှု ဖြစ်စဉ်တွေကြားမှာ မဖြစ်စလောက် အသိဥာဏ်လေးနဲ့ လှုပ်ရှားရှင်သန်နေရတဲ့ ဘဝပါလားလို့ ကိုယ့်ဘာသာကိုယ် သတိပြုမိတဲ့စိတ်ကလေး  မသိစိတ်ရဲ့ ဟိုးအနက်ရှိုင်းဆုံး ချောင်ကြိုချောင်ကြားနေရာကနေ မထွက် ထွက်လာအောင် စပျစ်သီးကိုအရည်ညှစ်သလို ဖိညှစ်နေသည်။

သူတို့ခရီးဆက်နေခဲ့တာ တစ်နာရီရှိပြီ။ နောက်ထပ် တစ်နာရီ ထပ်ပြီး ကုန်လွန်သွားပြန်တယ်။ နေမထွက်တဲ့နေ့ရဲ့ ဖျော့တော့တဲ့ အလင်းရောင်ကလေးက တဖြည်းဖြည်းနဲ့ ပိုပိုပြီး မှောင်စပြုလာသည်။ အဲဒီအချိန်မှာပဲ ဟိုးအဝေးတနေရာက အော်သံတခုဟာ ငြိမ်သက်နေတဲ့လေထုထဲက ခပ်သဲ့သဲ့ ပေါ်ထွက်လာသည်။ အော်သံက စူးစူးရှရှ မြင့်တက်လာပြီး အမြင့်ဆုံးရောက်ချိန်မှာ တခဏမျှ တုန်ခါဆွဲငင်နေပြီးမှ တဖြည်းဖြည်းခြင်း ဖျော့တော့ ပျောက်ကွယ်သွားသည်။ လမ်းပျောက်နေတဲ့ ဝိညာဉ်တစ်ကောင်ရဲ့ ဆွဲဆွဲငင်ငင် အော်သံဖြစ်ကောင်းဖြစ်လိမ့်မည်။ ရှေ့က သွားနေတဲ့လူက သူ့နောက်ကလူကို မျက်လုံးခြင်းဆုံမိသည်အထိ နောက်လှည့်ကြည့်သည်။ ထို့နောက် တစ်ယောက်ကိုတစ်ယောက် (အလယ်က သေတ္တာရှည်ကိုကျော်ပြီး) ခေါင်းဆတ်ပြလိုက်ကြသည်။

နောက်ထပ် အော်သံတစ်ခု ကြားရပြန်သည်။ စူးစူးဝါးဝါးအော်လိုက်သံက အပ်တစ်ချောင်းလို တိတ်ဆိတ်မှုကို ထွင်းဖောက်သွားသည်။ အော်သံက အနောက်ဘက်ကလာတာဖြစ်သည်။ အခုတင်ပဲ သူတို့ ဖြတ်သန်းလာခဲ့တဲ့ နှင်းပြင်ကျယ်ကြီးထဲက လာတဲ့အသံဖြစ်သည်။ ခုနကအသံကို တုန့်ပြန်တဲ့ တတိယအော်သံတစ်ခု ထွက်ပေါ်လာပြန်သည်။ အနောက်ဘက်ကပဲ ဖြစ်သည်။ ဒုတိယအော်သံရဲ့ ဘယ်ဘက်ကဖြစ်သည်။

"ဒီကောင်တွေ တို့နောက်ကို လိုက်လာနေကြတာ ဘီလ်"

အရှေ့ကလူက ပြောလိုက်ခြင်းဖြစ်သည်။

Links to this post